Karussell am Schillerplatz

Ei, ihr Leud…
Also aans is klar. Es Karussell steht ab dies Joahr woannerst (odder wie die Krotzeborjer saache: wo annerster).
Noa, net dass se denke, de Kerbplatz in Klanoam wär gesperrt odder die KG hätt umgeplant. Noa isch maan nur: Es hoat sisch einisches geännert seit seddemoals. In de dreißischer Joahrn woar de Kerbplatz an de unnere Rathausstroaß unn es Karussell stand an de Waach. Unn wenn mer de ältere Leud glaabt, dann wars ständisch voll besetzt.
Koa Wunner bei su viel Kinner, dies damals in Klanoam gab. De Walter Reinhardt bericht, dass es aach hin unn widder moal ausgefalle iss, es Karussell. Dann musste starke Kerle her zum Anschiewe. Unn fünf Tourn anschiewe gab dann aa Freitour. Die Buwe hawwe dann aach schun moal Freitourn angesammelt unn erst oawends oigelöst.
Weider gings mit em Kerbplatz unn em Karussell in de Fuffzischer Joahrn uff em Schillerplatz mit frisch lackierte Gäul unn Kutsche am Karussell.
Unn mit em neue Kerbplatz dann iwwer viele Joahrn uff de Haastädter Stroaß. Die KG hoat die Kerb in unn rund um die „Kron“ – kenne heud ur noch die alde Leut – gefeiert unn damit woar die Kerb als noch midde im Dorf, woas joa heudzudaach sehr selten iss.
Seit einische Joahrn, fraacht oafach moal de Welzbacher Reiner odder aaner vun de KG-Urgesteine, iss die Kerb unne am Moa uff em Festplatz, der wo joa eischentlisch in dem Sinn goar koan rischtische Festplatz iss.
Mer wolle joa kaan Krach mit de Dorfbewohner, awwer su en Kerbplatz fer die klaane Kinner mit em Karussell am Schillerplatz, dess wär doch woas Scheenes. Odder?